Skip to content
Prins David 1 Rutten - 2014

Veer komme altied baove water!

Op zaoterdagavondj 23 november 2013 is David Rutten, de 61e prins van carnavalsvereniging de Waterratte oet Ool/Herte oetgerope. David is 38 jaor en wirkzaam es technies medewerker biej Zjwumbad de Roerdomp in Remunj. Hae is getrouwdj mit Janine Poulussen en woont in Ool.

David I wurdtj biejgesjtange door 3 adjudante, Marc Poulussen, Peter Mintjens en Frank de Koning. David I hiltj op 1 fibberwarie 2014 vanaaf 19.00 oer zien prinseresepsie in de Tump in Ool. De sjpreuk van David I is “Veer komme altied baove water”!

Hoesorde Prins David 1
Prins David 1 mit adjudante

Proklamasie

Van ziene dorslustige hoogheid David I
Gebaore in Neel, maar sinds 8 jaor wonende aan de Brooksjtraot in Ool. Getrouwd mit Janine en dompteur van eine Tijger (hoeskat). Werkzaam es techniesche man in ut zjwumbad van Remunj.

Gegaeve op 23 November 2013
onger `t bie zeen van de Prezident, Kanseleer, Vors, Adjudante, Raod van 11, Dames, Dansgarde en Jeugraod make veer uch bekint:

1
Ten eerste

Dèt ich ut eine grote eer vinj det ich de 61ste prins van de Waterratte moog zeen.

2
Ten tweede

Dèt ut Vastelaovesplezeer in ut DNA zit vanne femilie mit eine Aad-Prins es vader en ein naefke dae gaer Prins wilt waere.

3
Ten derde

Dèt ich eine Keuning tusse mien adjudante höb.

4
Ten veerde

Dèt ich eine ambtenaar bun en dus gein sjtaekpenninge moog aksepteere, consumptiepenninge natuurlijk waal.

5
Ten viefde

Dèt ich väöl mot werke mit sjroevedreiers en baco’s.

6
Ten zesde

Dèsse eine Baco neet te lang in de handj mos haaje, en daorom maar baeter sjnel kins opdrinke.

7
Ten zevende

Dès se aepkes neet teveul kunstjes mos leere, want dan mot ut aepke veuls te vaak aantraeje.

8
Ten achste

Dèt ich mich sjnel wiej eine vis in ut water veul.

9
Ten negende

Dèt ich gaer kupke onger gaon mit ein grote fles, en dèt dèt geine fles beer zal zeen.

10
Ten teende

Dèt ein langk sezoen veul baco’s en dus veul geld geit koste.

11
Ten ellefde

Dèt ich mit de Vastlaovend de kop baove water haaj.

Dit alles ônger miene liefsjpreuk:

Veer komme altied baove water!

Sjlager

Titel: Baove water!

Download ‘m hiej:

Couplet:

Kom ver gaon nao ‘t zjwumbad
Al vruus ’t boete mit teen
Ich bun ein echte waterrat
Det kin eederein zeen

Mit de ouge dich gekneepe
Van zo hoog es ’t maar kin
Sjtort ich mich gans in ‘t deepe
Zo ’t Feesgedruis in.

Refrein:

Veer komme altied baove water,
Auch al wurt ’t soms get later
Vastelaovend det sjtruimt door mien blood
Jao hiej veul ich mich good.
Veer komme altied baove water,
Auch al wurt ’t soms get later
Elke daag det det zo wiejer geit,
Dan sjtaon ich der geheit.

Couplet:

Achterein van de glijbaan
Is net eine polonais

Jao, hiej komme veer draan
Lang neet zo sjoon gewaes

Kinse ’t ech neet meer haaije
Waat duisse den es waterrat
Leutse dich weer oplaaje

In ein heit bubbelbad

Refrein: 3 x

Back To Top