Druim 't, Doot 't!
Op zaoterdagavondj 18 november 2023 is in eine bomvolle Tump Guido Roumen ès de 69e Prins van Carnavalsvereniging de Waterratte oet Ool-Herte oetgerope. ZDH Prins Guido I wûrdtj biejgesjtange door maar leefs 4 adjudante: Zien broor Danny en zien vrûnj Eric, Koen en Martijn. De sjpreuk van ZDH Guido I is “DRUIM ‘T, DOOT ‘T!”
Proklamasie
Van Ziene Dorslustige Hoogheid Guido l. Samenwonend in ‘t Plekkersriek mit mien vriendin Elfi en trotse vader van Jeugdprins Jurre en adjudant Raf. Dèt ich in ‘t dagliske laeve mit mien greun vingers werk op ein sjool en in de tuine.
Gegaeve op 18 november 2023 onger ‘t bie zien van President Frans, Kanselier Ger, veurzitter Bas, vors Marco, Jeugprins Jurre l, Jeugprinses Lizzy, mien adjudante Danny, Eric, Koen en Martijn, de Raod van 11, de dames, dansgarde De Waterladies make veur uch bekint:
Dèt ich trots bön de 69ste prins van de Waterratte te zeen same mit miene zoon Jurre I.
Dèt d'r noe mer ein les belangriek is: Vastelaovend viere!
Dèt de Vastelaovend mit deze Prins geit bleuije.
Dèt ich vandaag 4x11+1 bön gewaore.
Dèt se gooije meziek nog altied ‘t beste zelf kins make.
Dèt ich Neet oet Lotttum kom mer waal gaer nao Neet oet Lottum gaon.
Dèt mit dees daag de sjoonste baum eine Lindebaum is.
Dèt se same nog altied meer kins dan allein.
Dèt auch ein Waterrat kin blieve plekke.
Dèt se eine boetemiens neet te lang binne mos haaije.
Dèt se neet wakker hoofs te ligke van eine sjoone druim.
En dèt alles onger miene liefsjpreuk:
Druim 't, Doot 't!
Sjlager
Titel: Druim 't, Doot 't!
Download ‘m hiej:
tèks:
Es de temperatuur begint te zakke
Zit dan neet bie de pakke neer
Hubs zin om ein feestje te viere
Alles in rust, zuus eeder keteer
Maar doe wits waat der aan zit te komme
Ein dink nieks is zo sjoon
Iets wo se al langer van druimdes
Waat veer noe mit zien alle gaon doon
Druim ‘t, Doot ‘t
Dan kumpt alles in volle bleuij
Ein prille leefde tusse twee
De vrundsjap in eeder kefee
Druim ‘t, Doot ‘t
Dan geneet se nog t meiste
En is de aovend hie nog lange neet gedaon
Vastelaovend is noe ech begonne
T kefeeke bie os aan de Maas
Dao bleuijt alles verder van binne
De gerst, mer dan in ein glaas
De schmink dae sjtraolt op dien köpke
De leedjes, wo limburgs in zit
De leefde veur de vastelaovend
Veer druime en make t mit
Druim ‘t, Doot ‘t
Dan kumpt alles in volle bleuij
Ein prille leefde tusse twee
De vrundsjap in eeder kefee
Druim ‘t, Doot ‘t
Dan geneet se nog t meiste
En is de aovend hie nog lange neet gedaon
Veer pakke nog lang neet de letste
Doe bus aan t gooije adres
Veer druime en doon waat veer wille
Op dees vastelaoves laevesles
Instrumentaal
Druim ‘t, Doot ‘t
Dan geneet se nog t meiste
en blieft de vastelaovend veur altied besjtaon
Dus blieft de vastelaovend veur altied besjtaon